21-may kuni bo‘lib o‘tadigan Angliya kubogi finaliga yo‘llanma olish uchun yarim finalchilar 23—24-aprel kunlari o‘zaro kurash olib boradi. Angliya futbol assotsiatsiyasi rasmiy saytining xabar berishicha, yarim finalda “Kristal Pelas” jamoasi “Uotford”ga qarshi, “Everton” esa chorak finalning “Vest Xem” — “Manchester Yunayted” o‘yini g‘olibiga qarshi kurash olib boradi.
Chorak finalning “Manchester Yunayted” — “Vest Xem” juftligida 1:1 hisobidagi durang qayd etilgani uchun, tomonlar endi “Vest Xem” maydonidagi takroriy o‘yinda ishtirok etadi. Kubokning amaldagi sohibi “Arsenal” esa “Uotford”dan 1:2 hisobida yengilib, turnirni tark etgan.
Mamlakat kubogida g‘oliblikni qo‘lga kiritgan jamoa 1 million 800 ming funt-sterling miqdorida mukofot puliga ega chiqadi. Final o‘yini chiptalari 5 funt etib belgilangan.
“Uembli”da o‘tgan avvalgi finallarda ishtirokchi jamoalar uchun 25 500 tadan chipta taqdim etilgan bo‘lsa, bu safar uning miqdori 28 650 tagacha oshirilgan. Bu “Uembli”dagi tomoshabinlarning 80 foizini jamoasi finalda o‘ynayotgan klub muxlislari tashkil etadi, deganidir.
Izoh (0)