15-martga o‘tar kechasi Angliya Premyer-ligasining 30-turi doirasida peshqadam “Lester” ligada jon saqlab qolish yo‘lida kurash olib borayotgan “Nyukasl”ni qabul qildi. Klaudio Ranyeri shogirdlari yaponiyalik Sindzi Okazakining 25-daqiqada kiritgan yagona goli evaziga muvaffaqiyat qozondi.
Shu tariqa, “Lester” mavsum yakuniga sakkizta tur qolganida eng yaqin ta’qibchisi — Londonning “Tottenxem” klubi bilan ochkolari farqini yana 5 taga yetkazib oldi. Ma’lumot uchun, Fransiya chempionati yakuniga sakkiz tur qolganida chempion jamoa aniqlangandi.
“Nyukasl” 29-turdagi o‘yinni o‘z maydonida debyutant “Bornmut”ga boy berganidan keyin amaldagi bosh murabbiy Stiv Maklaren iste’foga chiqarilib, uning o‘rniga Madridning “Real”idan bo‘shatilgan va 4-yanvardan buyon ishsiz yurgan Rafael Benites tayinlangandi. Ispaniyalik mutaxassis Angliya Premyer-ligasidagi eng shimoliy klubi bilan birinchi o‘yinni boy berdi. U Premyer-ligada 2004—2010-yillar oralig‘ida “Liverpul” klubiga, 2012/2013-yilgi mavsumda “Chelsi”ga ustozlik qilgan.
“Nyukasl”ning ketma-ket mag‘lubiyatlari sonini 4 taga yetkazdi. “Lester” esa o‘zining so‘nggi uch g‘alabasini faqatgina 1 ta gol urib, qo‘lga kiritdi. 30-turdan keyin “Lester” 63 ochko bilan liga karvonboshisi bo‘lib turibdi, “Tottenxem” 58 ochko jamg‘argan. Ulardan 1 ta kam o‘yinda maydonga tushgan “Arsenal” hisobida 52 ochko mavjud. “Nyukasl” esa hisobida 1 ta zaxira o‘yini bor holatida 24 ochko bilan 20 ta klub orasida 19-o‘rindan joy olgan. Zaxira o‘yini “Manchester Siti”ga qarshi bo‘lib o‘tadi.
APL 30-turidan joy olgan 5 ta uchrashuv Angliya Kubogi chorak final o‘yinlari sabab o‘tkazilmadi.
APL, 30-tur.
Izoh (0)