Biznesmen Alisher Usmonov 2015-yilning katta qismini chet elda o‘tkazdi. Biroq Rossiyaning soliq rezidenti bo‘lib hisoblanishi uchun, mamlakatda kamida yarim yil yashash talab etiladi, deb yozadi “RBK”.
Nashrning Federal antimonopoliya xizmatidagi manbasi aytishicha, Alisher Usmonov 2015-yilning kam qismini mamlakatda o‘tkazgani uchun Rossiya soliq rezidenti bo‘lmay qolgan. Federal soliq xizmati o‘z saytida aniqlik kiritishicha, jismoniy shaxslar daromadlariga soliq solinishi ularning fuqaroligiga bog‘liq emas: taqvim yilida rezidentlar deb ushbu yil davomida Rossiyada kamida 183 kun bo‘lgan shaxslar hisoblanadi.
Usmonovning o‘tgan yilgi daromadlari haqidagi deklaratsiya 1-aprelga qadar topshirilishi kerak, o‘shanda hujjatlar bo‘yicha norezidentlik maqomi haqida gapirish mumkin bo‘ladi; shu bilan birga, fakt bo‘yicha Usmonov Rossiyada biznes yuritishda davom etmoqda, dedi manba.
Usmonov aktivlari uchun bosh tuzilma bo‘lmish USM Holdings vakili biznesmen 2015-yilning katta qismini xorijda — Shveysariya, Monako, Germaniya, Italiya va boshqa mamlakatlarda o‘tkazganini tasdiqladi. Bu uning sport faoliyati bilan bog‘liq: biznesmen Xalqaro qilichbozlik federatsiyasi prezidenti, Xalqaro olimpiya qo‘mitasining olimpiya telekanalini rivojlantirish bo‘yicha komissiyasi a’zosidir.
USM xodimi ehtimoliy soliq norezidentligi USM’ning biznesiga hech qanday ta’sir o‘tkazmasligini aytdi: Usmonov o‘ziga tegishli kompaniyalarning operatsion faoliyati bilan shug‘ullanmay qo‘ygan.
Izoh (0)