Yanvar oxiridan beri oltin narxi 9,3 foizga oshib, unsiyasi uchun 1220 dollarga yetdi. Bloomberg agentligining bildirishicha, bu 1979-yildan beri fevraldagi eng yuqori o‘sish bo‘ldi, deya xabar beradi “RBK”.
Agentlik ekspertlarining fikricha, oltin investorlar uchun naf keltirishi jihatidan valyuta, qimmatli qog‘ozlar va korporativ obligatsiyalarni ortda qoldirdi. Masalan, dunyodagi eng tez o‘sayotgan valyuta — yapon iyenasi shu vaqt mobaynida 5,5 foizga ko‘tarilgan.
Asosiy faoliyati oltin bilan bog‘liq SPDR Gold Shares yil boshidan beri 4,5 milliard dollar jalb etgan, bu esa AQSh birjasida savdo qiluvchi ETF-fondlar orasida eng yuqori ko‘rsatkich hisoblanadi. Vaholanki, o‘tgan yil dekabrida oltin oxirgi besh yil mobaynida eng past darajada baholanayotgan edi.
“Oltin bu yilgi eng qiziqarli mavzu, — deya ta’kidlagan USAA Precious Metals & Minerals fondi menejerlaridan biri. — O‘tgan yil yozida uni ‘eskilik qoldig‘i’ deb atashayotgandi, endi bo‘lsa tobora ko‘p sotib olishmoqda”.
Oltinga bo‘lgan qiziqish dunyo iqtisodiyotida inqiroz alomatlari sezilayotgan asnoda ortib bormoqda. Muammolar AQShni ham chetlab o‘tmasligidan xavfsirayotgan investorlar mablag‘ini ishonchli himoyalashni istamoqda.
Izoh (0)