Бизнесмен Алишер Усмонов 2015 йилнинг катта қисмини чет элда ўтказди. Бироқ Россиянинг солиқ резиденти бўлиб ҳисобланиши учун, мамлакатда камида ярим йил яшаш талаб этилади, деб ёзади «РБК».
Нашрнинг Федерал антимонополия хизматидаги манбаси айтишича, Алишер Усмонов 2015 йилнинг кам қисмини мамлакатда ўтказгани учун Россия солиқ резиденти бўлмай қолган. Федерал солиқ хизмати ўз сайтида аниқлик киритишича, жисмоний шахслар даромадларига солиқ солиниши уларнинг фуқаролигига боғлиқ эмас: тақвим йилида резидентлар деб ушбу йил давомида Россияда камида 183 кун бўлган шахслар ҳисобланади.
Усмоновнинг ўтган йилги даромадлари ҳақидаги декларация 1 апрелга қадар топширилиши керак, ўшанда ҳужжатлар бўйича норезидентлик мақоми ҳақида гапириш мумкин бўлади; шу билан бирга, факт бўйича Усмонов Россияда бизнес юритишда давом этмоқда, деди манба.
Усмонов активлари учун бош тузилма бўлмиш USM Holdings вакили бизнесмен 2015 йилнинг катта қисмини хорижда — Швейцария, Монако, Германия, Италия ва бошқа мамлакатларда ўтказганини тасдиқлади. Бу унинг спорт фаолияти билан боғлиқ: бизнесмен Халқаро қиличбозлик федерацияси президенти, Халқаро олимпия қўмитасининг олимпия телеканалини ривожлантириш бўйича комиссияси аъзосидир.
USM ходими эҳтимолий солиқ норезидентлиги USM’нинг бизнесига ҳеч қандай таъсир ўтказмаслигини айтди: Усмонов ўзига тегишли компанияларнинг операцион фаолияти билан шуғулланмай қўйган.
Изоҳ (0)