Xitoyning Xaynan provinsiyasida pichoq bilan qurollangan kimsa bolalarga tashlanib, ulardan besh nafarini jarohatladi. Bu haqda “RIA Novosti” xabar bermoqda.
Hodisa Xaykou shahridagi boshlang‘ich maktabda, mashg‘ulotlar tugagandan so‘ng ro‘y berdi. Dastlabki ma’lumotlarga ko‘ra, 40 yoshlar atrofidagi erkak bolalar o‘quv muassasasi yaqinida bo‘lgan payt ularga hujum qilgan. Jabrlangan qizlardan birining holati og‘ir ekanligi aytilmoqda.
Erkak qo‘lga olingan, uni bunday xatti-harakatga undagan sabablar hozircha noma’lum. Politsiya hodisa tafsilotlarini o‘rganmoqda.
Izoh (0)