Rossiyaning Vorkuta shahridagi “Shimoliy” (“Severnaya”) konida yuz bergan portlash qurbonlaridan birining qizi Dariya Tryasuxo otasi avariyadan uch—to‘rt hafta avvalroq konda gaz o‘ta ko‘pligi va portlash ehtimoli haqida gapirganini ma’lum qildi, deb yozadi Meduza.
Tryasuxo so‘zlariga ko‘ra, korxona rahbariyati ishchilardan gazning yuqori zichligini qayd etgan gaz datchiklarini ko‘mib tashlashni so‘ragan.
Uning aytishicha, bunday sharoitda ishlashni istamagan konchilarga ishdan ketishni taklif qilishgan. FVV esa konchilarning qarindoshlari cho‘zilib ketgan qidiruv operatsiyasidan norozi bo‘la boshlagachgina, qutqaruvchilar otryadlarini yuborgan.
Konga egalik qiluvchi “Vorkutaugol” kompaniyasi qoidabuzarliklar haqidagi ma’lumotni rad etdi. “Konchilar datchiklarni yopib tashlaydigan davrlar o‘tib ketgan. Hozirda, agar xavf bo‘lsa, hech kim konchilarni smenaga chiqishga majburlay olmaydi”, — deya ta’kidladi kompaniya.
Eslatib o‘tamiz, 25-fevral kuni “Shimoliy” konida metan portlashi tufayli 4 kishi halok bo‘lgan, 26 kishi qamalda qolgandi. Portlash chog‘ida konda 111 kishi bo‘lgan, ulardan 81 kishi yuqoriga olib chiqilgan.
28-fevralga o‘tar kechasi konda qidiruv-qutqaruv ishlari vaqtida yana bir portlash sodir bo‘ldi. Natijada besh nafar qutqaruvchi va bir nafar konchi halok bo‘ldi.
Izoh (0)