Shimoliy Koreyada tankka qarshi raketa kompleksi sinovi muvaffaqiyatli o‘tkazilgani ma’lum qilindi

Shimoliy Koreya rahbari Kim Chen In tankka qarshi ko‘chma boshqariluvchi raketa kompleksining muvaffaqiyatli sinovidan so‘ng yengil turdagi qurollar afzalligiga alohida e’tibor qaratdi. Bu haqda Koreya markaziy telegraf agentligi ma’lum qilgan, deya xabar beradi “TASS”.

Kim Chen In Koreya Mehnat partiyasi markaziy harbiy komissiyasi nomidan kompleks yaratilishida ishtirok etgan olimlar, texnologlar va mudofaa sanoati ishchi-xodimlariga minnatdorchilik bildirdi.

“Front yaqinidagi qurolli qismlar va qirg‘oq himoyasi kuchlariga jo‘natish uchun mazkur komplekslarni turkum va ommaviy ishlab chiqarishga kirishish zarur. Dushman tanklari va boshqa zirhli texnikasini yo‘q qilish uchun mo‘ljallangan qurollarning yengil turlari KXDR hududining o‘ziga xos sharoitlarida afzalliklarga ega”, —deya ta’kidlagan Shimoliy Koreya yetakchisi.

Sinovlar qayerda o‘tkazilganiga aniqlik kiritilmagan.