Turkiya Suriya hududida quruqlikdagi operatsiyani o‘tkazish uchun tayyorgarlik ko‘rayotgani yo‘q. Mazkur bayonot, “RBK” xabariga ko‘ra, Turkiya prezidenti matbuot kotibi Ibrohim Kalin tomonidan berildi.
“Biz koalitsiya doirasida harakat qilishimizni bir necha bor ta’kidlagan edik. Shu munosabat bilan, bir tomonlama yoki Saudiya Arabistoni yoki boshqa bir mamlakat bilan birgalikda operatsiyaga tayyorgarlik ko‘rilayotgani haqida hech qanday gap bo‘lishi mumkin ham emas”, — dedi Kalin.
Fevral oyi o‘rtalarida Turkiya koalitsiya bo‘yicha o‘z hamkorlarini Suriya hududida IShIDga qarshi quruqlikdagi operatsiyalarni boshlashga chaqirayotgani ma’lum bo‘lgandi. Mazkur axborotni Reuters agentligiga turkiyalik amaldorlardan biri yetkazgan edi. Agentlik manbasi Turkiya hech bir harakatni yakka o‘zi amalga oshirmasligini ham qayd etib o‘tgan edi.
Turkiya tashqi ishlar vaziri Mavlut Chavusho‘g‘li Suriya hududida quruqlikda operatsiya o‘tkazish masalasi ayni vaqtda kun tartibida emasligini avvalroq ma’lum qilgan edi. Bundan tashqari, vazirning qayd etishicha, agar quruqlikda operatsiya o‘tkazish haqida qaror qabul qilinadigan bo‘lsa, unda koalitsiyaning barcha mamlakatlari qatnashishi kerak.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)