AQShning Jorjiya shtati rasmiylari ikki yil avvalgi politsiya reydi davomida og‘ir yaralangan bolaning ota-onasiga tovon tariqasida 3,6 million dollar to‘laydi. Atlanta shahridagi federal sud 26-fevral, juma kuni shunday mazmundagi kelishuvni tasdiqladi, deya xabar beradi “TASS”.
“Bolakay va uning oilasi uchun eng yaxshi natijaga erishishga harakat qildik. Kelishuv bo‘lib o‘tgan holatni o‘nglolmaydi, biroq oila fojiani unutishi va oldinga qadam tashlashiga yordam berishiga umid qilamiz”, — deya ta’kidlagan advokat Med Devis.
2014-yili politsiya 2 yoshga to‘lmagan o‘g‘ilning onasi Alisiya Fonsavan uyiga bostirib kiradi. Mazkur uyda narkodiler yashiringani haqida noto‘g‘ri ma’lumot olgan politsiyachilar shturmdan avval ichkariga yorug‘lik-tovush granatasini uloqtiradi. Granata to‘g‘ri bolaning manejiga borib tushadi va uning yuzi hamda ko‘kragiga qattiq shikast yetkazadi.
Ushbu ish bo‘yicha bir nafar politsiyachi — sherif o‘rinbosari Nikki Otri sud qilingan va aybsiz deb topilgandi.
Izoh (0)