O‘zbekistonda mamlakat hududiga o‘ta xavfli infeksiyalar, shu jumladan, Zika virusi keltirilishi va tarqalishiga yo‘l qo‘ymaslik bo‘yicha profilaktika chora-tadbirlari olib borilmoqda. Bu haqda “Narodnoye slovo” gazetasiga Sanitar-epidemiologiya nazorati bosh boshqarmasi boshlig‘i o‘rinbosari Dilorom Tursunova ma’lum qildi, deb yozadi “Gazeta.uz”.
“Barcha xalqaro aeroportlarda, vokzal va bojxona postlarida bemorlarni davlat chegarasini kesib o‘tish vaqtida barvaqt aniqlash uchun teplovizorlar (turli buyumlardan taralayotgan infraqizil nurlarni ekranda tasvir sifatida aks ettiradigan qurilma) o‘rnatildi”, — deya ta’kidladi u.
Dilorom Tursunovaning aytishicha, ayni paytgacha Zika virusining O‘zbekiston hududiga keltirilishi holatlari qayd etilmagan. Bunday holatlar Yevropa mamlakatlarida kuzatilgan.
Eslatib o‘tamiz, avvalroq Chexiyada va Yaponiyada Zika virusini yuqtirish bilan bog‘liq ilk holatlar qayd etilgan edi.
Zika bezgagi — maymunlar o‘tkir infeksiyali kasalligi bo‘lib, ba’zan odamga chivinlar orqali yuqadi va bezarar kechadigan bezgak bilan tavsiflanadi. Avvalroq AQShda Zika bezgagining odamdan odamga yuqishi bilan bog‘liq birinchi holat qayd etilgan edi. Virus homilador ayollar uchun o‘ta xavflidir, chunki u homilada miyaning potensial og‘ir shikastlanishiga olib keluvchi mikrotsefaliya (boshning normadan kichik bo‘lishi)ni keltirib chiqarishi mumkin.
Izoh (0)