Ўзбекистон Зика вирусига йўл қўймаслик бўйича чоралар кўрди

Ўзбекистонда мамлакат ҳудудига ўта хавфли инфекциялар, шу жумладан, Зика вируси келтирилиши ва тарқалишига йўл қўймаслик бўйича профилактика чора-тадбирлари олиб борилмоқда. Бу ҳақда «Народное слово» газетасига Санитар-эпидемиология назорати бош бошқармаси бошлиғи ўринбосари Дилором Турсунова маълум қилди, деб ёзади «Газета.uz».

«Барча халқаро аэропортларда, вокзал ва божхона постларида беморларни давлат чегарасини кесиб ўтиш вақтида барвақт аниқлаш учун тепловизорлар (турли буюмлардан таралаётган инфрақизил нурларни экранда тасвир сифатида акс эттирадиган қурилма) ўрнатилди», — дея таъкидлади у.

Дилором Турсунованинг айтишича, айни пайтгача Зика вирусининг Ўзбекистон ҳудудига келтирилиши ҳолатлари қайд этилмаган. Бундай ҳолатлар Европа мамлакатларида кузатилган.

Эслатиб ўтамиз, аввалроқ Чехияда ва Японияда Зика вирусини юқтириш билан боғлиқ илк ҳолатлар қайд этилган эди.

Зика безгаги — маймунлар ўткир инфекцияли касаллиги бўлиб, баъзан одамга чивинлар орқали юқади ва безарар кечадиган безгак билан тавсифланади. Аввалроқ АҚШда Зика безгагининг одамдан одамга юқиши билан боғлиқ биринчи ҳолат қайд этилган эди. Вирус ҳомиладор аёллар учун ўта хавфлидир, чунки у ҳомилада миянинг потенциал оғир шикастланишига олиб келувчи микроцефалия (бошнинг нормадан кичик бўлиши)ни келтириб чиқариши мумкин.