Yupiter sakkizinchi martga o‘tar kechasi Yer va Quyosh bilan bitta chiziq bo‘ylab joylashadi, natijada uni oddiy ko‘z bilan ko‘rish mumkin bo‘ladi, deya xabar bermoqda “Argumenti i fakti” Pulkovo observatoriyasi katta ilmiy xodimiga tayanib.
Uning so‘zlariga ko‘ra, butun qish davomida Yupiter tungi osmonda ko‘rinib turgan, 8-mart kuni esa ushbu davrning kulminatsiyasi kuzatiladi. 8-mart kuni u eng aniq-ravshan tarzda ko‘rinadi, biroq bundan bir necha kun avval va keyin ham gazli gigantni ufqda ko‘rish mumkin bo‘ladi.
Yupiter Quyosh atrofini bir marta aylanib chiqishga 12 yil sarflaydi, har 13 oyda esa u Yer va Quyosh bilan bitta chiziqda tiziladi.
“Yulduzlardan farqli tarzda, Yupiter quyosh nurini aks ettiradi xolos, ammo u biz bilan bitta sayyoralar tizimida joylashgan va ‘yuzma-yuz’ kelgan paytida u Yerdan trillionlab emas, 600 million km uzoqlikda bo‘ladi”, — dedi astronom.
Izoh (0)