Rossiyada bir qizga mer va’da qilgan sovg‘a — Matiz’ni topshirish o‘rniga undan 70 ming rubl undiriladigan bo‘ldi

Rossiyaning Vologda shahrida istiqomat qiluvchi Margarita Shchyoleva, sud xarajatlarini qoplash uchun, 70 ming rubl miqdorida kompensatsiya puli to‘laydigan bo‘ldi. “Yod” xabariga ko‘ra, u maktab va oliy ta’lim muassasasini muvaffaqiyatli tugatgani uchun shahar meri tomonidan va’da qilingan avtomobilning topshirilishini talab qilib, sudga murojaat qilgandi.

Margarita 2005-yili o‘z maktabidagi kumush medalning 1000-egasiga aylangan edi. O‘shanda shahar meri Aleksey Yakunichev qizga, agar u oliy ta’lim muassasasini muvaffaqiyatli bitirib, davlat muassasasiga ishga kirsa, unga Daewoo Matiz avtomobili topshirilishi haqidagi sertifikatni taqdim etgandi.

Qiz har ikkala talabni bajargan, biroq va’da qilingan avtomobilni ololmagan. Shundan so‘ng u sudga murojaat qilgan. Sud har ikkala talab bajarilganini tan olgan, biroq hujjat xatolar bilan rasmiylashtirilganini qayd etgan. Shu sababli ham va’daning bajarilishi rad etilgan.

Mer topshirgan sertifikat “Vorota severa” tijorat kompaniyasi tomonidan tayyorlangan bo‘lib, Shchyoleva aynan shu kompaniyani sudga bergan edi. Sud qaroridan so‘ng, qiz bu voqeani mer va biznesmenlarning vijdoniga havola qilgan, biroq oradan ma’lum vaqt o‘tib, sud ijrochilari kelgan va qizdan sud xarajatlarini qoplash uchun 70 ming rubl to‘lashni talab qilgan.