Россияда бир қизга мэр ваъда қилган совға — Matiz’ни топшириш ўрнига ундан 70 минг рубл ундириладиган бўлди

Россиянинг Вологда шаҳрида истиқомат қилувчи Маргарита Шчёлева, суд харажатларини қоплаш учун, 70 минг рубл миқдорида компенсация пули тўлайдиган бўлди. «Йод» хабарига кўра, у мактаб ва олий таълим муассасасини муваффақиятли тугатгани учун шаҳар мэри томонидан ваъда қилинган автомобилнинг топширилишини талаб қилиб, судга мурожаат қилганди.

Маргарита 2005 йили ўз мактабидаги кумуш медалнинг 1000-эгасига айланган эди. Ўшанда шаҳар мэри Алексей Якуничев қизга, агар у олий таълим муассасасини муваффақиятли битириб, давлат муассасасига ишга кирса, унга Daewoo Matiz автомобили топширилиши ҳақидаги сертификатни тақдим этганди.

Қиз ҳар иккала талабни бажарган, бироқ ваъда қилинган автомобилни ололмаган. Шундан сўнг у судга мурожаат қилган. Суд ҳар иккала талаб бажарилганини тан олган, бироқ ҳужжат хатолар билан расмийлаштирилганини қайд этган. Шу сабабли ҳам ваъданинг бажарилиши рад этилган.

Мэр топширган сертификат «Ворота севера» тижорат компанияси томонидан тайёрланган бўлиб, Шчёлева айнан шу компанияни судга берган эди. Суд қароридан сўнг, қиз бу воқеани мэр ва бизнесменларнинг виждонига ҳавола қилган, бироқ орадан маълум вақт ўтиб, суд ижрочилари келган ва қиздан суд харажатларини қоплаш учун 70 минг рубл тўлашни талаб қилган.