BMT bosh kotibi KXDRni provokatsiyalarni to‘xtatish va xalqaro majburiyatlarini bajarishga chaqirdi

BMT bosh kotibi Pan Gi Mun KXDR tomonidan amalga oshirilgan raketa parvozini qoraladi, deya xabar bermoqda “TASS”.

U Pxenyanni “provokatsion xatti-harakatlarni bas qilish”ga va xalqaro hamjamiyat oldidagi majburiyatlarini bajarishga chaqirdi.

Bosh kotib kanselyariyasi tomonidan tarqatilgan yozma bayonotda ta’kidlanishicha, ballistik texnologiyalardan foydalangan holda raketa uchirilishi BMT Xavfsizlik Kengashi rezolyutsiyasi qoidalarini buzgan.

Eslatib o‘tamiz, Shimoliy Koreya 7-fevral, yakshanbaga o‘tar kechasi uzoq masofaga parvoz qiluvchi raketani uchirdi. Yaponiya hukumati ma’lumotlariga ko‘ra, parvoz mahalliy vaqt bilan 09:31 (Toshkent vaqti bilan 05:31)da Okinava yo‘nalishida amalga oshirilgan.