The New Times jurnali Rossiya prezidenti Vladimir Putinning to‘ng‘ich qizi Mariya haqida olib borgan tadqiqotlarini e’lon qildi, deb yozadi Meduza.
Nashr ma’lumotlariga ko‘ra, qiz Moskva davlat universitetining fundamental tibbiyot fakultetida 2006-yildan 2011-yilgacha “Voronsova” familiyasi ostida tahsil olgan. Ushbu ism-sharifdan tashqari, Mariya Putina yana to‘rt xil familiyadagi hujjatlardan foydalangan.
MDUni qizil diplom bilan bitirib, Mariya Rossiya Sog‘liqni saqlash vazirligi Endokrinologiya ilmiy markazi aspiranturasiga kirgan. Markazni o‘sha vaqtda uning ilmiy rahbari Ivan Dedov boshqargan, shundan so‘ng Dedov Rossiya tibbiyot fanlari akademiyasi prezidenti, uning o‘g‘li Dmitriy Inson huquqlari bo‘yicha Yevropa sudi sudyasiga aylangan. Bundan tashqari, Sog‘liqni saqlash vazirligi buyrug‘i bilan Endokrinologiya ilmiy markazi qoshidagi Mariya ishlaydigan Bolalar endokrinologiyasi institutining qurilish ishlari tezlashtirilgan.
Nashr yozishicha, Putinning to‘ng‘ich qizi gollandiyalik tadbirkor Yorrit Faassenga turmushga chiqib, uning familiyasiga o‘tgan. Faassen 2007-yilda “Gazprom”da biznesni rivojlantirish bo‘yicha direktor lavozimini egallagan, ammo keyinroq kompaniyani tark etib, konsalting sohasiga ishga o‘tgan edi (u yaqin vaqtgacha “MEF Audit” direktorlar kengashini boshqargan).
Taxminan yarim yil avval Faassenning familiyasi “MEF Audit” saytidan yo‘qolgan, Mariya esa, AQShning Moskvadagi elchixonasi yaqinida joylashgan uyidagi qo‘shnilari aytishicha, ko‘rinmay qolgan. Jurnal ta’kidlashicha, “uning hayotida muhim hodisalar yuz bergan: u qiz farzandli bo‘lgan va tibbiyot fanlari nomzodiga aylangan”.
Eslatib o‘tamiz, avvalroq Putinning ikkinchi qizi — Katerina Tixonovaning Kirill Shamalov bilan to‘yi 2013-yilda bo‘lib o‘tgani haqida xabar berilgan edi.
Putin o‘z qizlari haqida xavfsizlik kabi nuqtai nazarlardan gapirib o‘tirmasligini ta’kidlagan. “Ular biznes va siyosat bilan shug‘ullanmaydi. Ular hech qayerga burnini suqmaydi”, — deydi Putin.
Izoh (0)