The New Times Путиннинг тўнғич қизи ҳақидаги тадқиқотларини эълон қилди

The New Times журнали Россия президенти Владимир Путиннинг тўнғич қизи Мария ҳақида олиб борган тадқиқотларини эълон қилди, деб ёзади Meduza.

Нашр маълумотларига кўра, қиз Москва давлат университетининг фундаментал тиббиёт факультетида 2006 йилдан 2011 йилгача «Воронцова» фамилияси остида таҳсил олган. Ушбу исм-шарифдан ташқари, Мария Путина яна тўрт хил фамилиядаги ҳужжатлардан фойдаланган.

МДУни қизил диплом билан битириб, Мария Россия Соғлиқни сақлаш вазирлиги Эндокринология илмий маркази аспирантурасига кирган. Марказни ўша вақтда унинг илмий раҳбари Иван Дедов бошқарган, шундан сўнг Дедов Россия тиббиёт фанлари академияси президенти, унинг ўғли Дмитрий Инсон ҳуқуқлари бўйича Европа суди судьясига айланган. Бундан ташқари, Соғлиқни сақлаш вазирлиги буйруғи билан Эндокринология илмий маркази қошидаги Мария ишлайдиган Болалар эндокринологияси институтининг қурилиш ишлари тезлаштирилган.

Нашр ёзишича, Путиннинг тўнғич қизи голландиялик тадбиркор Йоррит Фаассенга турмушга чиқиб, унинг фамилиясига ўтган. Фаассен 2007 йилда «Газпром»да бизнесни ривожлантириш бўйича директор лавозимини эгаллаган, аммо кейинроқ компанияни тарк этиб, консалтинг соҳасига ишга ўтган эди (у яқин вақтгача «МЭФ Aудит» директорлар кенгашини бошқарган).

Тахминан ярим йил аввал Фаассеннинг фамилияси «МЭФ Aудит» сайтидан йўқолган, Мария эса, АҚШнинг Москвадаги элчихонаси яқинида жойлашган уйидаги қўшнилари айтишича, кўринмай қолган. Журнал таъкидлашича, «унинг ҳаётида муҳим ҳодисалар юз берган: у қиз фарзандли бўлган ва тиббиёт фанлари номзодига айланган».

Эслатиб ўтамиз, аввалроқ Путиннинг иккинчи қизи — Катерина Тихонованинг Кирилл Шамалов билан тўйи 2013 йилда бўлиб ўтгани ҳақида хабар берилган эди.

Путин ўз қизлари ҳақида хавфсизлик каби нуқтаи назарлардан гапириб ўтирмаслигини таъкидлаган. «Улар бизнес ва сиёсат билан шуғулланмайди. Улар ҳеч қаерга бурнини суқмайди», — дейди Путин.