Jurnalist Vladimir Kara-Murza Checheniston rahbari Ramzan Qodirov o‘z Instagram’ida e’lon qilgan videoni “qotillikka qaratilgan ig‘vo” deb atadi. Bu haqda “Govorit Moskva” radiostansiyasi xabar bermoqda.
“Shubhasiz, birgalikda huquqni himoya qilish organlariga murojaat qilamiz. Afsuski, hozir ko‘rib turganimiz — Rossiya muxolifati yetakchisi Boris Nemsovning namoyishkorona qotilligidan keyin qariyb bir yil davomida jazo ko‘rmaslikning bevosita natijasi. Ushbu jinoyat izlari qanday bo‘lsa ham Grozniyga olib borishi hammaga ayon”, — dedi Kara-Murza.
Jurnalist, shuningdek, Strasburgga Boris Nemsovning o‘ldirib ketilishi haqidagi ish bo‘yicha tekshiruv ustidan nazorat o‘rnatish masalasini muhokama qilish uchun Yevropa Kengashi Parlament assambleyasi sessiyasiga Mixail Kasyanov, Janna Nemsova va Vadim Proxorov bilan birga borganini ta’kidladi.
Eslatib o‘tamiz, Ramzan Qodirov Instagram’iga “PARNAS” (Xalq ozodlik partiyasi) yetakchisi Mixail Kasyanovning snayper nishoni vizul effekti qo‘llanilgan videosini e’lon qilgan edi, unda jurnalist kichik Vladimir Kara-Murza ham aks etgan. Qodirov Instagram’dagi videosini “Kasyanov Rossiya muxolifati uchun pul olishga Strasburgga keldi. Tushunmaganlar tushunib oladi” — deya sharhlagan.
12-yanvar kuni Qodirov tizimdan tashqari muxolifatga nisbatan keskin fikr bildirgan edi. U muxolifat vakillariga nisbatan “xalq dushmani”ga bo‘lgani kabi munosabatda bo‘lishga chaqirgan edi. Checheniston rahbarining ushbu so‘zlari qizg‘in muhokamalarga sabab bo‘ldi.
Izoh (0)