Vashington universiteti olimlari real vaqtda bemorlar fikrlarini 96 foizgacha aniqlikda o‘qishga muvaffaq bo‘ldi, deya xabar bermoqda “Korrespondent.net”.
Tadqiqotchilar epilepsiya (tutqanoq kasalligi) bilan xastalangan bemorlar miyasining chakka qismiga elektrodlarni ulab, so‘ng ularni bir hafta davomida kuzatdi. Shu bilan bir vaqtda, elektrodlar faol bo‘lib turgan paytda, bemorlar miya to‘lqinlari tadqiqotida qatnashdi.
Barcha ko‘ngillilarga olimlar uy va ko‘chalar tasvirlarini ko‘rsatdi, ularning har biri ekranda roppa-rosa 400 millisoniya davomida namoyish etildi. Bu vaqt davomida mutaxassislar sensorli o‘tkazish markazi joylashgan manglay qismidan kelayotgan signallarni tahlil qildi.
Ta’kidlanishicha, sessiyalarning har birida dastur 96 foiz holatda real vaqt rejimida ushbu lahzada bemor xayolidan o‘tkazayotgan tasvirni topgan. Dastur odam o‘zi ko‘rgan rasmni idrok qilganidan 20 soniya o‘tiboq, o‘sha tasvir haqida ma’lum qilgan.
Tadqiqot mualliflaridan biri aytishicha, ushbu natijalar falajlangani yoki insultni boshidan kechirgani oqibatida o‘z tanasida “qamalib qolgan” bemorlar uchun kommunikatsiya mexanizmini yaratish imkoni borligidan darak beradi.
Izoh (0)