Rossiya mudofaa vazirligi Su-34 Turkiya havo chegarasini buzganligi haqidagi ma’lumotlarni inkor etdi

Rossiya mudofaa vazirligi Turkiya tashqi ishlar vazirligining 30-yanvar, shanba kuni e’lon qilingan Su-34 samolyoti mamlakat havo kengliklarini buzganligi haqidagi bayonotini safsata deb atadi. Bu haqda “RBK” xabar bermoqda.

“Rossiya harbiy samolyotlari Turkiya havo chegarasini buzmagan. Bu haqdagi bayonotlar esa quruq safsata. Havo kengliklarini nazorat etuvchi radarlar obyektning balandligi, yo‘nalishi va tezligini qayd etadi, xolos, qaysi mamlakatga tegishli ekanligini aniqlay olmaydi. Buni faqat boshqa bir samolyot yordamidagina amalga oshirish mumkin, bunday holat esa yuz bermagan”, — deya ta’kidlagan vazirlik rasmiy vakili Igor Konashenkov.

Turkiya tashqi ishlar vazirligi bayonotida 29-yanvar kuni ertalab Rossiya harbiy-havo kuchlarining Su-34 samolyoti mamlakat havo hududiga bostirib kirgani, samolyot ekipaji chegaraga yaqinlashayotgani haqida rus va ingliz tillarida ko‘p bor ogohlantirilgani ma’lum qilingan. Turkiya prezidenti Rajab Toyyib Erdo‘g‘on mazkur hodisa sabab Vladimir Putin bilan uchrashmoqchi ekanligini bildirgan.