AQSh mudofaa vazirligi vakili Mark Rayt Rossiyaning Su-34 samolyoti Turkiya havo hududiga bostirib kirgani haqida avvalroq Anqara tomonidan e’lon qilingan ma’lumotni tasdiqladi, deb yozadi “RBK”.
“Biz ma’lumotlardan xabardormiz va kecha (30-yanvar kuni) yana bir Rossiya harbiy samolyoti Turkiya va NATO havo hududiga bostirib kirganini tasdiqlay olamiz”, — deya Rayt “RIA Novosti”ga ma’lum qildi.
Shu bilan birga, amaldor Pentagon Rossiyani yana bir bora Turkiya havo hududini hurmat qilishga va mintaqada yuqori darajadagi beqarorlik xavfini keltirib chiqaradigan xatti-harakatlarni bas qilishga chaqirishini qo‘shib qo‘ydi.
Rossiya mudofaa vazirligi esa Turkiya tashqi ishlar vazirligining Su-34 samolyoti mamlakat havo kengliklarini buzganligi haqidagi bayonotini safsata deb atadi.
Nashr eslatishicha, 30-yanvar, shanba kuni Turkiya tashqi ishlar vazirligi bayonot e’lon qildi, unda aytilishicha, 29-yanvar kuni ertalab Rossiya harbiy-havo kuchlarining Su-34 samolyoti mamlakat havo hududiga bostirib kirgan. Shu munosabat bilan Rossiya elchisi tashqi siyosat muassasasiga tegishli notani qabul qilib olish uchun chaqirildi.
Erdo‘g‘on esa ushbu hodisa tufayli Putin bilan shaxsan uchrashish istagini bildirdi.
Ushbu mavzu bo‘yicha NATO bosh kotibi Yens Stoltenberg ham bayonot berdi. U Rossiyani Shimoliy Atlantika alyansiga a’zo mamlakat havo hududi buzilishiga yo‘l qo‘ymaslik uchun “barcha zarur choralarni ko‘rishga” chaqirdi.
Izoh (0)