Hindistonning Chennay shahrida shaxmat bo‘yicha an’anaviy xalqaro turnir davom etmoqda. O‘z tarixida sakkizinchi bor tashkil etilgan Chennai Open musobaqasining 4-tur uchrashuvida o‘zbekistonlik xalqaro grossmeyster Marat Jumayev g‘alabaga erishdi, deb xabar beradi “Olamsport”.
Oq donalarda harakat qilgan o‘zbekistonlik shaxmatchi mezbonlar vakili Shet Jaykumar Sammedni mag‘lubiyatga uchratdi. To‘rtta uchrashuvda 3 g‘alaba va bir durang qayd etgan Marat Jumayev 3,5 ochko bilan turnir jadvalida 8-o‘ringa ko‘tarilib oldi. Uchinchi pog‘onadagi ukrainalik grossmeyster Vitaliy Sivuk hisobida ham 3,5 ochko bor.
Musobaqa jadvalida ukrainalik grossmeysterlar – Vitaliy Bernardskiy va Yuriy Solodovnichenko yuz foizlik ko‘rsatkich – 4 ochko bilan peshqadamlik qilyapti. Bugun, 21-yanvar kuni Jumayev 5-tur uchrashuvida musobaqaning birinchi tartib raqamli shaxmatchisi rossiyalik Boris Grachev bilan bahs yuritadi.
Eslatib o‘tamiz, 3-tur uchrashuvida qora donalarda harakat qilgan Jumayev hindistonlik Arjun Erigaysi bilan durang o‘ynagandi.
Turnirda 11 davlatdan jami 213 shaxmatchi bosh mukofot uchun dona suryapti. Ulardan 22 nafari xalqaro grossmeysterlar, 25 nafari esa xalqaro ustalardir.
Izoh (0)