O‘zbekiston olimpiya terma jamoasiga U-23 Osiyo chempionatida nima yetishmadi?

Futbol bo‘yicha O‘zbekiston olimpiya terma jamoasi Rio—2016 Olimpiya o‘yinlari yo‘llanmalari tikilgan U-23 Osiyo chempionatidagi ishtirokini kutilganidan vaqtliroq yakunladi. Samvel Babayan qo‘l ostidagi jamoa musobaqa guruh bosqichining dastlabki ikki o‘yinida Janubiy Koreya va Iroqqa mag‘lub bo‘lib, Olimpiada yo‘llanmasidan mahrum bo‘ldi.

O‘zbekiston olimpiya terma jamoasi futbolchilari nima sababdan bunday muvaffaqiyatsizlikka uchradi, ularga nima xalal berdi yoki nima yetishmadi? Bu og‘riqli savolga futbol mutaxassislari javob beradi.

Vaqt yetishmadi

Rauf Inileyev, O‘zbekiston milliy terma jamoasining sobiq bosh murabbiyi: “Terma jamoamizda musobaqaga tayyorgarlik ko‘rish uchun kam vaqt bo‘ldi. Shu kungacha olimpiya terma jamoamizni ko‘plab murabbiylar boshqardi — bu ham qaysidir ma’noda o‘z tasirini o‘tkazmasdan qolmadi” (“Championat.asia”).

Jamoaviy o‘yin yetishmadi

Murod Otajonov, “Bunyodkor” futbol klubi akademiyasi murabbiyi: “Yoshlarimizda jamoaviy o‘yin yaxshi shakllanmagani bilinib qoldi. Futbol — jamoaviy o‘yin. Hamma yigitlar harakat qilishi kerak edi. Ammo o‘yinchilar oxirigacha yuqori saviyada o‘ynay olmadi” (“Championat.asia”).

Saviya yetishmadi

Samvel Babayan, O‘zbekiston olimpiya terma jamoasi bosh murabbiyi, Iroqqa qarshi o‘yindan so‘ng: “[Iroq uchinchi golini urgan vaziyatda] futbolchimiz (Vladimir Kozak) oxirigacha kurashish o‘rniga to‘xtab qoldi. O‘yin hakam hushtagigacha davom etadi va buni futbolchilar bilishi kerak. Afsuski, [Kozak] o‘sha vaziyatda qanday saviyadagi futbolchi ekanini bildirib qo‘ydi. Yuqori saviyali futbolchilar bunday vaziyatlarda nima qilish kerakligini yaxshi biladi” (O‘FF matbuot xizmati).

Ishonchli darvozabon yetishmadi

Rauf Inileyev, O‘zbekiston milliy terma jamoasining sobiq bosh murabbiyi: “Bizga, eng avvalo, ishonchli darvozabon yetishmadi. Himoyachilarimiz ham bir-birini tushunib o‘ynay olmadi... Agarda bu tomondan kamchilik bo‘lmaganida, o‘ylaymanki, oldingi chiziqdagi ishlarimiz yomon kechmasdi” (“Championat.asia”).

Lider yetishmadi

Rauf Inileyev, O‘zbekiston milliy terma jamoasining sobiq bosh murabbiyi: “Asosiy kamchiligimiz bu — olimpiya terma jamoasida lider o‘yinchining yo‘qligidir. Birorta futbolchi yaqqol ajralib turgani yo‘q. Oldingi chiziq vakiliga qulay pas oshirib beruvchi dispetcherni ko‘rmadim” (“Championat.asia”).

G‘oliblik ruhi yetishmadi

Sayfiddin Ermatov, Ravshan Ermatovning otasi, sobiq hakam: “Olimpiya terma jamoasining mag‘lubiyatlari kayfiyatimizni tushirib yubordi. Ularning ko‘rsatgan o‘yinlariga sira tushuna olmadim. Bizga g‘oliblik ruhi yetishmadi” (“Championat.asia”).

Babayanga tajriba yetishmadi

Rustam Akramov, O‘FF Terma jamoalar markazi texnik direktori: “Samvel Babayan haqida shunday deyishim mumkin: u yaxshi inson, jamoani yaxshi shakllantirgan, ‘Paxtakor’ bilan O‘zbekistonning ikki karra chempioni bo‘lgan. Shuningdek, u yaxshi menejer va murabbiy hamdir. Biroq, Babayanga musobaqada qatnashish tajribasi yetishmadi, deb o‘ylayman” (“Championat.asia”).

Borimiz shu

Samvel Babayan, O‘zbekiston olimpiya terma jamoasi bosh murabbiyi, Iroqqa qarshi o‘yindan so‘ng: “Biz Olimpiada yo‘llanmasi uchun kurashayotgan jamoaga yutqazdik. Nima ham derdim, demak bugungi kunda imkoniyatlarimiz, borimiz shu ekan. Afsuski hech narsa ko‘rsata olmadik” (“Championat.asia”).