Qurollangan shaxslar Iroq poytaxti Bag‘doddagi Jawhara savdo markaziga hujum uyushtirdi. Mahalliy rasmiylarga tayanib, AP’ning xabar qilishicha, hujum qilganlar binoga kiraverishda avtomobilga qo‘yilgan bombani portlatib, ichkariga bostirib kirgan. Ular 10 kishini o‘ldirib, 25 kishini yaralagan, deb xabar qiladi “RBK”.
Hodisa joyiga yetib kelgan kuch tuzilmalari xodimlari atrofni o‘rab olib, jangarilar bilan otishmaga kirishdi.
Iroq xavfsizlik xizmatidagi manbaning xabar qilishicha, hujum qilganlar soni 20 ga yaqin, ularning aksariyati savdo markazining tomiga chiqib olgan va ular xudkush kamarini taqib olgan bo‘lishi mumkin. Manbaning qayd etishicha, garovga olinganlarning ko‘pchiligi ayollardir.
Iroq IIVdagi manbaning so‘zlariga ko‘ra, kamida 16 kishi o‘ldirilgan, ulardan bir nafari yosh bola, deb yozadi Bloomberg.
AP agentligining sog‘liqni saqlash tizimidagi suhbatdoshi 50—75 ga yaqin kishi garovga olinganini, uch nafar politsiyachi halok bo‘lganini ma’lum qildi.
Hozircha hech bir guruh hujum uchun javobgarlikni o‘z bo‘yniga olmadi. Ammo agentlikning qayd etishicha, Iroqda ko‘pincha IShID hujumlar uyushtirib turadi.
Iroqning Al Sumaria telekanali huquq-tartibot organlarining sa’y-harakati bilan barcha garovga olinganlar ozod qilinganini xabar qilmoqda.
Bag‘doddagi harbiy operatsiyalar qo‘mondoni, general-leytenant Abdul Amir al-Shammari savdo markazida hech kim garovga olinmaganini telekanalga ma’lum qildi. Uning so‘zlariga ko‘ra, xudkushlar bino yaqinida bomba portlatib, uni ichkarisiga kirishga uringan, biroq qo‘riqchilar bunga xalaqit qilgan. Hujum qilganlardan biri qurollangan bo‘lgan va o‘t ochishni boshlagan, lekin u o‘ldirilgan.
Izoh (0)