AQSh Tinch okeani qo‘mondonligi harbiy-dengiz kuchlari B-52 strategik bombardimonchi samolyotining Janubiy Koreya ustidan parvoz qilganini tasdiqladi. Bu haqda “TASS” xabar bermoqda.
“AQSh harbiy-havo kuchlarining Guam orolidagi Andersen aviabazasi ixtiyorida bo‘lgan B-52 bombardimonchisi KXDR o‘tkazgan yadro sinoviga javoban 10-yanvar, yakshanba kuni Osan shahri (Janubiy Koreya) hududida parvozni amalga oshirdi. Unga Koreya Respublikasining F-15 va Amerikaning F-16 qiruvchi samolyotlari hamrohlik qildi”, — deyiladi qo‘mondonlik matbuot xizmati tarqatgan xabarda.
Admiral Xarri Xarris mazkur parvoz “AQSh milliy xavfsizlik hamda Janubiy Koreya va Yaponiyadagi ittifoqdoshlar xavfsizligini ta’minlash masalalariga sodiqligi namoyishi” ekanligini bildirgan.
Eslatib o‘tamiz, oldinroq AQSh va Janubiy Koreya mamlakatga B-52 bombardimonchi samolyotlari hamda atom suvosti kemasini keltirish masalasini muhokama qilgani haqida xabar berilgandi.
Izoh (0)