Aktrisa Yulduz Rajabova “E’tirof” milliy mukofotini qo‘lga kiritish orzusida bo‘lganini ma’lum qildi. Bu haqda u “Bekajon” gazetasiga bergan intervyusida aytib o‘tdi.
“Bu mukofot hayotimdagi eng ajoyib sovg‘a bo‘ldi. Nazarimda, qalbida san’at ishtiyoqi yongan har bir san’atkor bunday mukofotlarga sazovor bo‘lishni istaydi, shu yo‘lda mehnat qiladi”, — dedi aktrisa.
“Yo‘q, men kutmagandim, degan fikrlarga qo‘shilmayman. Sabab, har gal o‘sha sahnada Milliy mukofot topshirilayotganda, zalda o‘tirgan san’atkorlar: ‘Qaniydi, men ham shunday mukofot olsam’, deb orzu qiladi. Men ham o‘tgan yillarda shunday orzu-havas qilganman”, — dedi Yulduz Rajabova.
“‘E’tirof’ meni yanada olg‘a qadam tashlashga, undan-da yuqori marralarni zabt etishga undadi. Mukofotga loyiq ko‘rilganimni eshitgach, suratga olish jarayonidagi barcha qiyinchiliklarim, aktrisalikning ortidagi mashaqqatlar bir zumda unutilib ketdi”, — deya qo‘shimcha qildi Yulduz Rajabova.
Eslatib o‘tamiz, 2015-yilgi “E’tirof” milliy mukofoti taqdimotida aktrisa Yulduz Rajabova “Yilning eng yaxshi kinoaktrisasi” deb topildi. U xonanda Lolaning yangi klipida suratga tushayotgani uchun, taqdimotda qatnashmagan.
Izoh (0)