O‘zbek milliy akademik drama teatri aktrisasi Shahlo Temirova uchun 2015-yil mo‘jizalarga boy bo‘ldi, deya xabar bermoqda “Bekajon” gazetasi.
“2015-yil men uchun mo‘jizalarga boy bo‘ldi, desam xato bo‘lmaydi. Sababi, yil davomida eng ajoyib filmlarda suratga tushdim, ekranda aktrisa sifatida tanildim. Mehnatlarim besamar ketmadi va yil yakunida ‘E’tirof’ milliy mukofoti bilan taqdirlandim”, — dedi aktrisa.
Shahlo Temirovaning qayd etishicha, mukofotni qo‘lga kiritish va sahnada, barcha san’atkorlar orasida e’tirof etilish uning uchun juda ham katta sharaf va mas’uliyatdir.
“Buni qarangki, taqdimotda azbaroyi qattiq hayajonlandimmi, uyga qaytishim bilanoq tobim qochib, tug‘uruqxonaga yo‘l oldik. Ikki kun o‘tib, qizalog‘im tug‘ildi. Yil yakunida qo‘shaloq mukofotga ega bo‘lganimdan juda ham mamnunman”, — dedi aktrisa.
Eslatib o‘tamiz, 2015-yilgi “E’tirof” milliy mukofoti taqdimotida aktrisa Shahlo Temirova “Yilning eng yaxshi teatr aktrisasi” deb topildi.
Izoh (0)