Xonanda va aktyor Sharof Muqimov onasining betobligi sabab ijodiy faoliyatini vaqtincha to‘xtatishga majbur bo‘lganini ma’lum qildi. Bu haqda u “Bekajon” gazetasiga bergan intervyusida aytib o‘tdi.
“Oilamiz boshiga og‘ir kulfat tushib qoldi. Onam og‘ir betob. Ularni oyoqqa turg‘azaman, deb ijodni ham yig‘ishtirib qo‘ygandim. Bunday vaziyatlarda xoh qiz, xoh o‘g‘il bo‘lsin, farzandga qiyin bo‘larkan. Hozir u kishining salomatliklarini Xudodan so‘rab o‘tiribmiz”, — dedi Sharof Muqimov.
“Onajonimga tikilib, ba’zan aktyorlikdan xabardorligimdan xursand bo‘ldim. Chunki onam hozirgacha o‘zlarining qanday kasal ekanliklarini bilmaydilar. Ularga: ‘Siz sog‘lomsiz, sal charchabsiz, dam oling’, deb ishontira olyapman, yuragimdagi dard-alamni ko‘rsatmaslikka kuch topyapman”, — dedi san’atkor.
“Onamning yolg‘iz, erkatoy o‘g‘liman. Shu bois bu holatni qabul qila olish, singdirish oson emas. Ularni davolatish niyatida Hindistonda olib yurgan o‘n besh kun — hayotimdagi eng og‘ir kunlarim... Xudodan mo‘jiza kutib yashayapman”, — dedi xonanda.
“Yaxshi ham do‘stlarim, yaqinlarim bor. Ular meni hayotga, ijodga bo‘lgan qiziqishim, ishonchimni qaytarishdi. Onam uchun ham kuchli bo‘lishim kerakligini tushuntirishdi”, — deya qo‘shimcha qildi Sharof Muqimov.
Izoh (0)