Yengil atletika federatsiyalari xalqaro assotsiatsiyasi (IAAF) axloq komissiyasi Rossiya yengil atletika federatsiyasining sobiq prezidenti Valentin Balaxnichevni umrbod diskvalifikatsiya qildi. Bu haqda “Vedomosti” xabar bermoqda.
IAAF sobiq prezidentining o‘g‘li, assotsiatsiya sobiq maslahatchisi Papa Massat Diak hamda Rossiya yengil atletika terma jamoasi murabbiylaridan biri Aleksey Melnikov ham sportdan umrbod chetlatildi. Assotsiatsiya antidoping qo‘mitasining sobiq rahbari Gabriel Dolle besh yilga diskvalifikatsiya qilindi. Bundan tashqari, Balaxnichev va Diak 25 ming, Melnikov esa 15 ming dollar jarimaga tortilishi mumkin.
Eslatib o‘tamiz, 1999-yil noyabridan 2015-yil avgustigacha IAAF'ni boshqargan Lamin Diak rossiyalik yengil atletikachilar doping qabul qilishi holatlarini yashirish uchun pora olganlikda gumonlanib, hibsga olingandi.
Izoh (0)