O‘zMTRK “Sport” telekanali futbol bo‘yicha U-23 Osiyo chempionati uchrashuvlarini namoyish etadi. Chempionat uchrashuvlaridan jonli va yozib olingan translyatsiyalar jadvali telekanalning haftalik ko‘rsatuvlar dasturiga kiritilgan.
12-yanvardan e’tiboran har kuni chempionatning kamida ikkita uchrashuvini jonli efirda, boshqa o‘yinlarini esa yozib olingan holda namoyish etish rejalashtirilgan. Ba’zi uchrashuvlar, xususan, O‘zbekiston olimpiya terma jamoasi ishtirokidagi o‘yinlar takroran namoyish etiladi.
Avvalroq “Sport” telekanali 12-yanvar kuni Qatarda start oladigan futbol bo‘yicha U-23 Osiyo chempionati uchrashuvlarini translyatsiya qilishga tayyorgarlik ko‘rayotgani haqida xabar berilgan edi. Eslatib o‘tamiz, O‘zbekiston olimpiya terma jamoasi Osiyo chempionati final bosqichi “C” guruhida Janubiy Koreya, Iroq hamda Yaman U-23 terma jamoalariga qarshi maydonga tushadi.
O‘zbekiston U-23 terma jamoasi Osiyo chempionati bahslarini 13-yanvar kuni Janubiy Koreya olimpiya terma jamoasiga qarshi o‘yin bilan boshlaydi. O‘zbekiston olimpiya terma jamoasi guruh bosqichidagi ikkinchi o‘yinini 16-yanvar kuni Iroq olimpiya terma jamoasiga qarshi o‘tkazsa, so‘nggi turda, 19-yanvar kuni Samvel Babayan bosh murabbiyligidagi terma jamoa Yamanga qarshi maydonga tushadi.
Oldinroq mazkur OChda ishtirok etadigan O‘zbekiston olimpiya termasining tarkibi e’lon qilingandi. Terma jamoa musobaqa arafasida so‘nggi yig‘inni o‘tkazish uchun Dubayga jo‘nab ketgan.
Izoh (0)