Janubiy Koreya parlamenti 8-yanvar, juma kuni KXDRni qoralab rezolyutsiya qabul qildi, deya xabar bermoqda “RIA Novosti”. Rezolyutsiya Milliy majlis (parlament)ning 207 a’zosi tomonidan bir ovozdan ma’qullangan.
Tasdiqlangan hujjatga muvofiq, KXDRda o‘tkazilgan yadro sinovi jiddiy provokatsiya hamda Janubiy Koreya va Shimoli-sharqiy Osiyo aholisi xavfsizligiga tahdiddir, shuningdek, u “xalqaro bosimni va mamlakat izolyatsiyasini kuchaytiradi, xolos”.
8-yanvar kuni Yaponiya parlamenti ham KXDR harakatlarini qoralovchi rezolyutsiyani qabul qilgan edi. Mamlakat bosh vaziri Sindzo Abe KXDRni “mavjud yadro va raketa dasturlaridan to‘liq voz kechish hamda BMT Xavfsizlik Kengashi rezolyutsiyasiga to‘liq rioya qilish”ga chaqirdi.
Eslatib o‘tamiz, 6-yanvar kuni Shimoliy Koreya markaziy televideniyesi KXDR mamlakat shimoli-sharqida vodorod bombasini muvaffaqiyatli tarzda sinovdan o‘tkazganini xabar qildi.
Keyinroq Shimoliy Koreya o‘zini yadro quroliga ega mamlakatlar klubiga qo‘shdi, biroq uni birinchi bo‘lib qo‘llamasligini ma’lum qildi.
Izoh (0)