Amerikaning Yevropadagi mashg‘ulotlarda qatnashish uchun mo‘ljallangan “havo—yer” sinfidagi Hellfire raketasi xatolik tufayli Kubaga yuborildi, deya xabar bermoqda Meduza. Hodisa harbiy texnologiyalarni yo‘qotish bilan bog‘liq eng shov-shuvlisi bo‘ldi.
NATO kuchlari mashg‘ulotlari uchun atalgan raketa 2014-yil boshida Florida shtatining Orlando aeroportidan Ispaniyaga yuborilgan. Raketa Ispaniyadan Germaniyaga, u yerdan esa yana AQShga jo‘natilishi kerak edi, biroq Fransiya aeroportidan uni, hozircha noaniq sabablarga ko‘ra, yuk reysi bilan Gavanaga yuborishgan.
Raketani ishlab chiqargan Lockheed Martin kompaniyasi yo‘qotish haqida AQSh Davlat departamentini xabardor qildi.
Ba’zi xabarlarga ko‘ra, Amerika hukumati 2014—2015-yillarda Kuba hukumatini raketani qaytarishga ko‘ndirishga uringan. Shu bilan bir vaqtda, FQB u Kubaga haqiqatan ham xatolik tufayli yuborilgani yoki bu josuslik maqsadidagi fitna natijasi bo‘lganmi — shunga aniqlik kiritishga harakat qildi.
Kubaga yuborilgan raketaga jangovar qism o‘rnatilmagan bo‘lsa-da, uni yo‘qotish AQShga ko‘ngilsizliklar keltirishi mumkin edi, xususan, hukumat Kuba qurilma haqidagi ma’lumotni Xitoy, Rossiya yoki Shimoliy Koreyaga berib yuborishidan xavfsiradi.
Izoh (0)