Eron o‘z fuqarolariga Saudiya Arabistonidagi haj ziyoratini taqiqladi

Eron o‘z fuqarolariga Saudiya Arabistonida joylashgan Makka va Madinaga haj ziyoratiga borishni taqiqladi, deya xabar bermoqda “Korrespondent.net”.

Shu bilan birga, Tehron Arabistondan mahsulotlar importini ham man qildi. Ushbu tadbirlar diplomatik aloqalar uzilishi va Yamandagi Eron elchixonasiga, go‘yo, Saudiya Arabistoni rahbarligidagi koalitsiya tomonidan berilgan aviahujumga javob bo‘ldi.

Hajning taqiqlanishi Saudiya Arabistoni iqtisodiyotiga salbiy ta’sir qilishi mumkinligi aytilmoqda. Arabiston har yili haj ziyoratidan 18 milliard dollar daromad oladi. Rasmiy ma’lumotlarga ko‘ra, yiliga 600 ming eronlik Makka va Madinaga hajga boradi.

Eslatib o‘tamiz, Saudiya Arabistoni 3-yanvar, yakshanba kuni kechki payt Eron islom respublikasi bilan diplomatik aloqalar uzilganini e’lon qildi. Bu nufuzli shia ulamosi Nimr an-Nimr Saudiya Arabistoni hukumati tomonidan qatl etilgani bilan bog‘liq.