Американинг Европадаги машғулотларда қатнашиш учун мўлжалланган «ҳаво—ер» синфидаги Hellfire ракетаси хатолик туфайли Кубага юборилди, дея хабар бермоқда Meduza. Ҳодиса ҳарбий технологияларни йўқотиш билан боғлиқ энг шов-шувлиси бўлди.
НАТО кучлари машғулотлари учун аталган ракета 2014 йил бошида Флорида штатининг Орландо аэропортидан Испанияга юборилган. Ракета Испаниядан Германияга, у ердан эса яна АҚШга жўнатилиши керак эди, бироқ Франция аэропортидан уни, ҳозирча ноаниқ сабабларга кўра, юк рейси билан Гаванага юборишган.
Ракетани ишлаб чиқарган Lockheed Martin компанияси йўқотиш ҳақида АҚШ Давлат департаментини хабардор қилди.
Баъзи хабарларга кўра, Америка ҳукумати 2014—2015 йилларда Куба ҳукуматини ракетани қайтаришга кўндиришга уринган. Шу билан бир вақтда, ФҚБ у Кубага ҳақиқатан ҳам хатолик туфайли юборилгани ёки бу жосуслик мақсадидаги фитна натижаси бўлганми — шунга аниқлик киритишга ҳаракат қилди.
Кубага юборилган ракетага жанговар қисм ўрнатилмаган бўлса-да, уни йўқотиш АҚШга кўнгилсизликлар келтириши мумкин эди, хусусан, ҳукумат Куба қурилма ҳақидаги маълумотни Хитой, Россия ёки Шимолий Кореяга бериб юборишидан хавфсиради.
Изоҳ (0)