“O‘zbektelekom” O‘zbekistonning tarixiy va madaniy meros obyektlari hududida, jumladan, sayyohlar ko‘p bo‘ladigan joylarda Wi-Fi tarmog‘ini rivojlantirish bo‘yicha ish olib bormoqda. Bu haqda “O‘zbektelekom” aksiyadorlik kompaniyasi tomonidan 25-dekabr kuni o‘tkazilgan matbuot anjumanida ma’lum qilindi.
Bugungi kunda “O‘zbektelekom”ning Wi-Fi tarmog‘i Xorazm, Qashqadaryo, Surxondaryo va Toshkent viloyatlaridagi umumiy maydoni 441,8 ming kvadrat metr bo‘lgan jami 25 obyektni qamrab olgan, bundan tashqari, ikki obyektda rekonstruksiya ishlari olib borilmoqda.
Xizmatning qulay tomoni, foydalanuvchi bir Wi-Fi kartasi yordamida “O‘zbektelekom”ning Wi-Fi tarmog‘iga kiritilgan barcha obyektlarga kompaniya internet xizmatlaridan foydalana oladi. Agar abonent kartani Xivada sotib olgan bo‘lsa, undan Termizda yoki Shahrisabzda ham foydalanishi mumkin.
Xizmatga ulanish va Wi-Fi kartalari sotuvi “O‘zbektelekom” savdo ofislari, mehmonxonalar, sayyohlik obyektlarida, shuningdek, “Matbuot tarqatuvchi” kompaniyasi kiosklarida amalga oshirilmoqda.
Qayd etishlaricha, 2016-yilda Wi-Fi tarmoqlarini “O‘zbekturizm” milliy kompaniyasi bilan hamkorlikda operativ kengaytirish uchun Samarqand, Buxoro va Toshkent shaharlarida 40 ta obyekt belgilangan.
Izoh (0)