Самарқанд, Бухоро ва Тошкентдаги 40 та сайёҳлик объекти 2016 йилда «Ўзбектелеком»нинг Wi-Fi тармоғига уланади

«Ўзбектелеком» Ўзбекистоннинг тарихий ва маданий мерос объектлари ҳудудида, жумладан, сайёҳлар кўп бўладиган жойларда Wi-Fi тармоғини ривожлантириш бўйича иш олиб бормоқда. Бу ҳақда «Ўзбектелеком» акциядорлик компанияси томонидан 25 декабрь куни ўтказилган матбуот анжуманида маълум қилинди.

Бугунги кунда «Ўзбектелеком»нинг Wi-Fi тармоғи Хоразм, Қашқадарё, Сурхондарё ва Тошкент вилоятларидаги умумий майдони 441,8 минг квадрат метр бўлган жами 25 объектни қамраб олган, бундан ташқари, икки объектда реконструкция ишлари олиб борилмоқда.

Хизматнинг қулай томони, фойдаланувчи бир Wi-Fi картаси ёрдамида «Ўзбектелеком»нинг Wi-Fi тармоғига киритилган барча объектларга компания интернет хизматларидан фойдалана олади. Агар абонент картани Хивада сотиб олган бўлса, ундан Термизда ёки Шаҳрисабзда ҳам фойдаланиши мумкин.

Хизматга уланиш ва Wi-Fi карталари сотуви «Ўзбектелеком» савдо офислари, меҳмонхоналар, сайёҳлик объектларида, шунингдек, «Матбуот тарқатувчи» компанияси киоскларида амалга оширилмоқда.

Қайд этишларича, 2016 йилда Wi-Fi тармоқларини «Ўзбектуризм» миллий компанияси билан ҳамкорликда оператив кенгайтириш учун Самарқанд, Бухоро ва Тошкент шаҳарларида 40 та объект белгиланган.