O‘zbekiston Milliy kutubxonasida 24-dekabr kuni Chet tillarni rivojlantirish va ommaviylashtirish markazi — Your school tomonidan “Zamonaviy internet-jurnalistika” mavzusida davra suhbati bo‘lib o‘tdi. Kutubxona matbuot xizmati xabariga ko‘ra, tadbirda jurnalistlar, blogerlar, zamonaviy internet-jurnalistikaga qiziqqan kutubxona foydalanuvchilari va Your school markazi a’zolari ishtirok etdi.
Davra suhbatida blogerlar: Abror Qodirov, Diyor Imomxo‘jayev, Temur A’zam, Sanjar Said va Gulruxsora Xudoyberdiyeva mehmon sifatida qatnashdi.
Mehmonlar davra suhbati qatnashchilariga internet-jurnalistikaga doir ma’lumotlarni keltirdi, O‘zbekistonda faoliyat yuritayotgan 100 dan ziyod internet-nashrlar, bloglar, oliy o‘quv yurtlarida tashkil etilgan va mazkur sohada ishlaydigan jurnalistlar safining kengayishiga hissa qo‘shayotgan ixtisoslashtirilgan kurslar haqida ham so‘zlab berdi.
Shuningdek, davra suhbatida O‘zbekistonda yoshlarning ma’naviy immunitetini shakllantirish, axborot madaniyatini oshirish, axborotni to‘g‘ri va sog‘lom tahlil qilishga chaqirish borasida amalga oshirilayotgan ishlar haqida ham fikr almashildi.
“O‘zbek va ingliz tillarida tashkil etilgan tadbirda ishtirok etganlar zamonaviy internet-jurnalistika tushunchasiga doir o‘zlarini qiziqtirgan barcha savollarga javob oldilar”, — deyiladi kutubxona matbuot xizmati xabarida.
Izoh (0)