Rossiya Davlat dumasi 22-dekabr, seshanba kuni Federal xavfsizlik xizmatining (FXX) quroldan foydalanish vakolatlarini kengaytiruvchi qonun loyihasini shoshilinch tarzda ko‘rib chiqdi. Bu haqda “RBK” xabar bermoqda.
Mazkur tuzatishlarga ko‘ra, FXX harbiy xizmatchilari o‘qotar qurol bo‘lmaganida zaruriy mudofaa yoki jinoyatchini qo‘lga olish chog‘ida qo‘l ostidagi istalgan vositalardan foydalanishi mumkin.
FXX haqidagi qonunga yangi modda — turar joy va boshqa binolar, yer uchastkalari hamda hududlarga kirish tartibi qo‘shildi. Jumladan, unda maxsus xizmat xodimlariga jamoat tartibini ta’minlash uchun binolarga kirish huquqi beriladi. Shuningdek, tuzatishlar teraktlarning oldini olish, garovdagilarni ozod etish uchun ko‘pchilik odam to‘planganda ham o‘qotar quroldan fodalanish, teraktlar sodir etganda ayollar va voyaga yetmaganlarga nisbatan qurol qo‘llash imkonini beradi.
Qonun loyihasiga ko‘ra, FXX xodimlariga nisbatan cheklovlar ham joriy etilgan: ularga rahbariyat ruxsatisiz chet elliklar, xorijiy OAV, “xorijiy agent vazifasini bajarayotgan” notijorat tashkilotlari bilan muloqot man etiladi. O‘zlari, turmush o‘rtoqlari hamda voyaga yetmagan farzandlariga chet el banklarida hisob raqam ochish va foydalanish, “xizmat vazifasi taqozo etmasa”, xorijda ko‘chmas mulkka egalik qilishni taqiqlash taklif qilinmoqda.
Izoh (0)