Россия Давлат думаси 22 декабрь, сешанба куни Федерал хавфсизлик хизматининг (ФХХ) қуролдан фойдаланиш ваколатларини кенгайтирувчи қонун лойиҳасини шошилинч тарзда кўриб чиқди. Бу ҳақда «РБК» хабар бермоқда.
Мазкур тузатишларга кўра, ФХХ ҳарбий хизматчилари ўқотар қурол бўлмаганида зарурий мудофаа ёки жиноятчини қўлга олиш чоғида қўл остидаги исталган воситалардан фойдаланиши мумкин.
ФХХ ҳақидаги қонунга янги модда — турар жой ва бошқа бинолар, ер участкалари ҳамда ҳудудларга кириш тартиби қўшилди. Жумладан, унда махсус хизмат ходимларига жамоат тартибини таъминлаш учун биноларга кириш ҳуқуқи берилади. Шунингдек, тузатишлар терактларнинг олдини олиш, гаровдагиларни озод этиш учун кўпчилик одам тўпланганда ҳам ўқотар қуролдан фодаланиш, терактлар содир этганда аёллар ва вояга етмаганларга нисбатан қурол қўллаш имконини беради.
Қонун лойиҳасига кўра, ФХХ ходимларига нисбатан чекловлар ҳам жорий этилган: уларга раҳбарият рухсатисиз чет элликлар, хорижий ОАВ, «хорижий агент вазифасини бажараётган» нотижорат ташкилотлари билан мулоқот ман этилади. Ўзлари, турмуш ўртоқлари ҳамда вояга етмаган фарзандларига чет эл банкларида ҳисоб рақам очиш ва фойдаланиш, «хизмат вазифаси тақозо этмаса», хорижда кўчмас мулкка эгалик қилишни тақиқлаш таклиф қилинмоқда.
Изоҳ (0)