Afrika ittifoqi Burundidagi vaziyatni tartibga solish uchun ushbu mamlakatga besh ming nafar tinchlikparvar kuchlarini joylashtirishga tayyor edi, biroq Burundi hukumati ittifoqning bu taklifini rad etdi, deb xabar beradi “Interfaks”.
“Biz xorijlik harbiylarga Burundida bo‘lishga ruxsat bermaymiz. Biz ularga muhtoj emasmiz”, — dedi Burundi prezidentining vakili Gervais Abayeo.
“Biz Afrika ittifoqining Afrikadagi bir nechta missiyalariga harbiylar yetkazib beruvchi davlatmiz, endi ular tinchlikparvar kuchlarni bizning mamlakatimizga kiritmoqchimi? Ular bizni yordamga muhtoj deb o‘ylayotgan bo‘lsa, nima uchun o‘zimizning jangchilarimizni qaytarib bermayapti?” , — dedi Abayeo.
Oldinroq Burundida Afrika tinchlikparvar kuchlarini joylashtirish uchun bir-ikki hafta talab etilishi ma’lum qilingan edi.
Eslatib o‘tamiz, Burundida mamlakat prezidenti Pyer Nkurunziza uchinchi muddatga saylanish rejasini e’lon qilganidan beri tartibsizliklar davom etmoqda. Mamlakat poytaxti Bujumburada joylashgan harbiy bazalarga 11-dekabr kuni uyushtirilgan hujumlardan so‘ng u yerdan 87 kishining jasadi topildi.
Izoh (0)