Noyabr oyida “Daryo”ga 895 ming unikal foydalanuvchi tashrif buyurdi (bu — rekord!). Internet-nashrimizning Android va iOS uchun mo‘ljallangan mobil dasturlarini hozirgi vaqtda 241 ming foydalanuvchi ishlatayogan bo‘lsa, Google’ning mobil dasturlar do‘koni — Google Play’da “Daryo”ning mobil dasturi O‘zbekistonda eng ko‘p yuklab olinayotgan 20 dasturdan biri bo‘lib turibdi (aniqrog‘i, 17-o‘rinda — “Daryo”dan yuqorida birorta “o‘zbek” yo‘q).
Bundan tashqari, Facebook, Twitter va “Odnoklassniki”dagi “Daryo” sahifalari faol yuritilmoqda (har bir komment, replay, menshn va izohlarni kuzatib borayapmiz. Hammasini!), so‘nggi vaqtlarda hatto Internetdan qo‘rqadigan buvijonlar ham foydalanayotgan Telegram messenjerida @daryobot va “Toshqin ‘Daryo’” kanali ishga tushirildi, saytda kun sarhisobi, Telegram’dagi kanalda suratli dayjestlar berib borilmoqda.
Maqtanishga arzigulik yangilik — 23-noyabrdan beri Milliy qidiruv tizimi — WWW.uz’ning saytlar reytingida “Daryo” birinchi o‘rinda bormoqda. Reyting ma’lumotlariga ko‘ra, so‘nggi 17 kundan beri “Daryo”ga har kuni kamida 200 ming tashrifchi kirmoqda (29-noyabrni istisno qilaylik — u og‘ir yakshanba edi). Xo‘sh, qanday qilib bunday bo‘ldi, bunga kim sababchi?
Albatta siz — “Daryo”ni o‘qish bilan kunni boshlab, yutuqlarni qo‘lga kiritgan vaqtimizda olqishlab, xatolarga yo‘l qo‘yganimizda ularni ko‘rsatib (aytdik-ku, ijtimoiy tarmoqlardagi har bir fikrni diqqat bilan kuzatib boryapmiz, deb), “Mobil muxbir” orqali tesha tegmagan xabarlar yo‘llab, internet-nashrimiz auditoriyasi yanada kengayishiga ko‘mak bergan mushtariylarimiz. Ha, aynan siz!
“Butun Uznetda birinchi raqamli sayt bo‘lish — bu yoqimli va ayni vaqtda juda mas’uliyatli. Bu bizga bildirilgan samimiy ishonch belgisi. Biz bir necha ming internet foydalanuvchilari tomonidan bildirilgan bu ishonchni oqlash uchun tinimsiz ishlashda, tashrifchilarimizga tezkor va qiziqarli axborotlarni yangi formatlarda uzatishda, ularni mamnun etishda davom etamiz”, — dedi “Daryo” loyihasi rahbari Farhod Fayzullayev.
Yangiliklar “Daryo”sidan chetda qolib ketmang!
Izoh (0)