Ноябрь ойида «Дарё»га 895 минг уникал фойдаланувчи ташриф буюрди (бу — рекорд!). Интернет-нашримизнинг Android ва iOS учун мўлжалланган мобил дастурларини ҳозирги вақтда 241 минг фойдаланувчи ишлатаёган бўлса, Google’нинг мобил дастурлар дўкони — Google Play’да «Дарё»нинг мобил дастури Ўзбекистонда энг кўп юклаб олинаётган 20 дастурдан бири бўлиб турибди (аниқроғи, 17-ўринда — «Дарё»дан юқорида бирорта «ўзбек» йўқ).
Бундан ташқари, Facebook, Twitter ва «Одноклассники»даги «Дарё» саҳифалари фаол юритилмоқда (ҳар бир коммент, реплай, меншн ва изоҳларни кузатиб бораяпмиз. Ҳаммасини!), сўнгги вақтларда ҳатто Интернетдан қўрқадиган бувижонлар ҳам фойдаланаётган Telegram мессенжерида @daryobot ва «Тошқин ‘Дарё’» канали ишга туширилди, сайтда кун сарҳисоби, Telegram’даги каналда суратли дайжестлар бериб борилмоқда.
Мақтанишга арзигулик янгилик — 23 ноябрдан бери Миллий қидирув тизими — WWW.uz’нинг сайтлар рейтингида «Дарё» биринчи ўринда бормоқда. Рейтинг маълумотларига кўра, сўнгги 17 кундан бери «Дарё»га ҳар куни камида 200 минг ташрифчи кирмоқда (29 ноябрни истисно қилайлик — у оғир якшанба эди). Хўш, қандай қилиб бундай бўлди, бунга ким сабабчи?
Албатта сиз — «Дарё»ни ўқиш билан кунни бошлаб, ютуқларни қўлга киритган вақтимизда олқишлаб, хатоларга йўл қўйганимизда уларни кўрсатиб (айтдик-ку, ижтимоий тармоқлардаги ҳар бир фикрни диққат билан кузатиб боряпмиз, деб), «Мобил мухбир» орқали теша тегмаган хабарлар йўллаб, интернет-нашримиз аудиторияси янада кенгайишига кўмак берган муштарийларимиз. Ҳа, айнан сиз!
«Бутун Узнетда биринчи рақамли сайт бўлиш — бу ёқимли ва айни вақтда жуда масъулиятли. Бу бизга билдирилган самимий ишонч белгиси. Биз бир неча минг интернет фойдаланувчилари томонидан билдирилган бу ишончни оқлаш учун тинимсиз ишлашда, ташрифчиларимизга тезкор ва қизиқарли ахборотларни янги форматларда узатишда, уларни мамнун этишда давом этамиз», — деди «Дарё» лойиҳаси раҳбари Фарҳод Файзуллаев.
Янгиликлар «Дарё»сидан четда қолиб кетманг!
Изоҳ (0)