Musulmonlarni qo‘llab-quvvatlovchi yahudiy, KXDRdagi vodorod bombasi, Toshkentda kutilayotgan Xavi va kunning boshqa muhim yangiliklari

“Daryo”da doimiy rukn — har kuni eng muhim yangiliklarning kechki dayjesti berib boriladi.

1. Facebook asoschisi ta’na-malomatlarga qolayotgan musulmonlarni qo‘llab-quvvatlashini ma’lum qildi. “Yahudiy sifatida, ota-onam meni har qanday hamjamiyatlarga uyushtirilayotgan hujumlarga qarshi kurashmoq kerakligiga o‘rgatgan”, — dedi Mark Sukerberg.

2. Kim Chen In KXDRda vodorod bombasi mavjudligini ma’lum qildi. Koreya yarimorolidagi vaziyatni yanada keskinlashtiruvchi xabarga janubiy koreyaliklar shubha bilan qaramoqda — Janubiy Koreya razvedkasi KXDR vodorod bombasiga ega emas deb hisoblamoqda.

3. O‘zbekistondagi kitob do‘konlarida eng ko‘p sotilayotgan kitoblar reytingi e’lon qilindi. Birinchi uchlikda Poelyo Koelyo, Abdulla Qahhor va Deyl Karnegi asarlari. Aytmoqchi, AQSh prezidenti Barak Obama ham o‘z talqini bo‘yicha 2015-yilning eng yaxshi kitobi nomini ma’lum qildi.

4. Tarixchi olim Goga Hidoyatov olamdan o‘tdi. Besh yillar avval maktab va kollejlarni tamomlagan o‘quvchilar uning 9—11-sinf uchun tayyorlangan “Jahon tarixi” kitoblarini sevib o‘qishardi.

5. “Barselona” afsonasi Xavi Toshkentga kelishi mumkin. Futbol bo‘yicha Osiyo Chempionlar Ligasi guruh bosqichiga qur’a tashlandi va “Paxtakor”, “Lokomotiv”, “Nasaf”, “Bunyodkor” 2016-yilgi musobaqadagi o‘z raqiblari nomini bilib oldi. OChL doirasida O‘zbekistonga “mehmonga” kelishi mumkin bo‘lgan yulduzlar orasida, Xavidan tashqari, O‘zbekiston milliy terma jamoasi yetakchilari — Aziz Haydarov va Sardor Rashidov ham bor.