O‘zbekiston fuqarosining biometrik pasporti O‘zbekiston hududida yashab turgan fuqarolarga 10 kun ichida, O‘zbekistonning konsullik ro‘yxatida turgan chet eldagi o‘zbekistonliklarga esa 15 kunda tayyorlab beriladi. Bu haqda, Toshkent shahar IIBB Xorijga chiqish, kelish va fuqarolikni rasmiylashtirish boshqarmasi markaz boshlig‘i, mayor Sanjar Qosimovga asoslanib, “Darakchi” gazetasi xabar bermoqda.
S.Qosimovning ma’lum qilishicha, agar fuqaro 2015-yil oxirigacha eski namunadagi pasportini biometrik pasportga almashtirishga ulgurmasa, unga nisbatan O‘zbekiston Ma’muriy javobgarlik to‘g‘risidagi kodeksining 223-moddasiga muvofiq chora ko‘riladi.
MJtKning 223-moddasiga ko‘ra, “pasporti bo‘lishi shart bo‘lgan fuqaroning pasportsiz yoki haqiqiy bo‘lmagan pasport bilan yashashi” eng kam ish haqining bir baravaridan (3-dekabr holatiga ko‘ra — 130 240 so‘m) uch baravarigacha miqdorda (3-dekabr holatiga ko‘ra — 390 720 so‘m) jarima solishga sabab bo‘ladi.
Avvalroq mayor Sanjar Qosimov biometrik pasport olish muddati 2017-yilgacha uzaytirilgani haqidagi gap-so‘zlarni rad etgandi.
Ma’lumot uchun, O‘zbekiston Prezidentining 2011-yil 5-yanvardagi “O‘zbekiston Respublikasida pasport tizimini takomillashtirishga doir qo‘shimcha chora-tadbirlar to‘g‘risida”gi farmoniga muvofiq, 2011-yildan fuqarolarga biometrik pasport berilishi boshlangan. Fuqarolarning amaldagi nobiometrik pasportlari 2015-yil 31-dekabrgacha haqiqiy hisoblanadi
Izoh (0)