Ўзбекистон фуқаросининг биометрик паспорти Ўзбекистон ҳудудида яшаб турган фуқароларга 10 кун ичида, Ўзбекистоннинг консуллик рўйхатида турган чет элдаги ўзбекистонликларга эса 15 кунда тайёрлаб берилади. Бу ҳақда, Тошкент шаҳар ИИББ Хорижга чиқиш, келиш ва фуқароликни расмийлаштириш бошқармаси марказ бошлиғи, майор Санжар Қосимовга асосланиб, «Даракчи» газетаси хабар бермоқда.
С.Қосимовнинг маълум қилишича, агар фуқаро 2015 йил охиригача эски намунадаги паспортини биометрик паспортга алмаштиришга улгурмаса, унга нисбатан Ўзбекистон Маъмурий жавобгарлик тўғрисидаги кодексининг 223-моддасига мувофиқ чора кўрилади.
МЖтКнинг 223-моддасига кўра, «паспорти бўлиши шарт бўлган фуқаронинг паспортсиз ёки ҳақиқий бўлмаган паспорт билан яшаши» энг кам иш ҳақининг бир бараваридан (3 декабрь ҳолатига кўра — 130 240 сўм) уч бараваригача миқдорда (3 декабрь ҳолатига кўра — 390 720 сўм) жарима солишга сабаб бўлади.
Аввалроқ майор Санжар Қосимов биометрик паспорт олиш муддати 2017 йилгача узайтирилгани ҳақидаги гап-сўзларни рад этганди.
Маълумот учун, Ўзбекистон Президентининг 2011 йил 5 январдаги «Ўзбекистон Республикасида паспорт тизимини такомиллаштиришга доир қўшимча чора-тадбирлар тўғрисида»ги фармонига мувофиқ, 2011 йилдан фуқароларга биометрик паспорт берилиши бошланган. Фуқароларнинг амалдаги нобиометрик паспортлари 2015 йил 31 декабргача ҳақиқий ҳисобланади
Изоҳ (0)