Ukraina prezidenti Pyotr Poroshenko Donbassdagi urushda qatnashgani uchun 14 yilga ozodlikdan mahrum etilgan Rossiya fuqarosi Vladimir Starkovni afv etdi. Bu haqda, Meduza xabariga ko‘ra, Ukraina prezidenti saytida axborot berilgan.
Xabar berishlaricha, Starkov o‘zini mustaqil deb e’lon qilgan “Donetsk xalq respublikasi” (“DXR”) ayirmachilari qo‘lida asirlikda saqlangan Ukraina armiyasi harbiy xizmatchisi Andrey Grechanovga almashtirilgan.
Ukraina prezidenti saytida xabar berilishicha, 1-dekabrga o‘tar kechasi Poroshenko “Rahmon” jangovar laqabi bilan ham tanilgan Grechanov bilan uchrashib, asirlikda ko‘rsatgan mardligi va qahramonligi uchun minnatdorchilik bildirdi.
“Andrey Grechanov kabilar uchun biz oxirigacha kurashamiz. Biz uni asirlikdan qutqarish uchun 18 marta harakat qildik. Bugungni yorug‘ kunda u uyiga qaytdi”, — dedi Poroshenko.
Rossiya fuqarosi Vladimir Starkov qurol-yarog‘ ortilgan mashina bilan 2015 yil 25 iyul kuni Donetsk viloyatining “Berezovoye” nazorat-o‘tkazish punktida qo‘lga olingan edi. Yuk mashinasi ayirmachilar nazorati ostidagi hududda harakatlanayotgan bo‘lgan.
Ukraina xavfsizlik xizmati Vladimir Starkov o‘zini rossiyalik mayor ekani, Rossiya hukumatidan unga yordam berishni so‘rayotgani aks etgan videoyozuvni e’lon qilgandi. Rossiya Mudofaa vazirligi Starkovning Rossiya armiyasining amaldagi zobiti ekanligi borasidagi bayonotiga hech qanday izoh bermagandi.
Ukraina sudi 25 sentabr kuni Starkovni “Ukrainaga qarshi tajovuzkor urushda” va Rossya Bosh shtabi buyruqlarini bajarishda aybdor deb topib, mol-mulkini musodara qilish bilan 14 yilga ozodlikdan mahrum etgandi.
Izoh (0)