Indoneziyalik tergovchilar Malayziyaning Air Asia aviakompaniyasiga tegishli Airbus A320-200 layneri qulashi sabablarini ma’lum qildi. Bu haqda, Reuters agentligiga asoslanib, “Gazeta.ru” xabar bermoqda.
Tergov ma’lumotlariga ko‘ra, bort kompyuteridagi nosozlik va ushbu nosozlikni bartaraf etishga harakat qilgan ekipajning noto‘g‘ri harakatlari fojiaga sabab bo‘lgan.
“Ekipajning harakatlari samolyotni odatiy kursdan chiqarib, uzoq vaqt davomida irg‘itish holatida turib qolishiga sabab bo‘lgan, uchuvchilar samolyotni bu holatdan qaytarib chiqara olmagan”, — deyiladi Indoneziya milliy transport xavfsizligi qo‘mitasi bayonotida.
Avvalroq Air Asia’ning halokatga uchragan samolyoti yo‘lovchilarining qarindoshlari aviakompaniya va Airbus konserni ustidan sudga shikoyat qilgani ma’lum bo‘lgandi.
Malayziyaning Air Asia aviakompaniyasiga tegishli, Indoneziyaning Surabaya shahridan Singapurga parvoz qilayotgan Airbus A320-200 layneri 2014-yilning 28-dekabr kuni halokatga uchragan edi. Layner bortida 162 kishi bo‘lgan. Samolyot Kalimantan oroli yaqinida, Yava dengiziga qulagan.
Izoh (0)