Yilning ibratli 12 voqeasi (foto)

Bugungi urushlar, namoyishlar va siyosiy evrilishlar zamonida insoniylikni saqlab qola olish va og‘ir lahzalarda yaqinlarga yordam qo‘lini cho‘za bilish juda muhim. Chunki eng kichik yaxshi amal ham insonlarga jahonning barcha boyliklaridan-da ko‘proq mehr va quvonch taqdim etadi, deb yozadi AdMe.

Quyida 2015-yil davomida amalga oshirilgan va butun dunyoda odamlarning olqishiga sazovor bo‘lgan mehr-muhabbatga to‘la ibratli voqealar keltirilgan.

Qutqargani uchun minnatdorchilik

Ko‘p yillar avval Mayk Xyuz ismli o‘t o‘chiruvchi 9 oylik Daniel Devisonni yong‘indan omon olib chiqqandi. Yong‘indan 17 yil o‘tib qiz o‘zining qutqaruvchisini bitiruv oqshomiga taklif qildi va ta’sirli nutq o‘qidi: “Maykning bugungi tadbirda ishtirok etayotgani men uchun juda muhim. Hammasi butunlay boshqacha bo‘lishi mumkin bo‘lganini o‘ylasam, har doim baxtiyorligimdan yig‘layman. Agar siz bo‘lmasangiz, men bu yerda bo‘lmasdim”.

• Amerikalik qiz o‘zini 17 yil avval yong‘indan qutqargan o‘t o‘chiruvchini bitiruv oqshomiga taklif qildi

Tug‘ilgan kun sovg‘asi

Autizmdan aziyat chekuvchi 6 yoshli Glenn Buratti o‘z tug‘ilgan kunini bayramona nishonlashga qaror qildi, biroq taklif qilingan mehmonlarning hech biri tantanaga kelmadi. Uning onasi bu haqda Facebook’da xabar qoldirganidan so‘ng, bolakayni tabriklash uchun politsiyachilar va o‘t o‘chiruvchilar guruhi kelib, sovg‘a ulashdi.

Hammani qariyaga yordam berishga chaqirgan yigit

Temiryo‘l nazoratchisi Joy Sayganik ikki o‘smir keksa bir kishining uyini masxara qilayotganini ko‘rib qoldi va buni shundoqligicha qoldirmaslikka qaror qildi. Josh Facebook’da ko‘ngillarni yordamga chorlab, qariyaning uyini oqlashda yordam so‘radi. Inspektorning chaqiruvidan so‘ng uyni ta’mirlash ishlarida 95 kishi qatnashdi.

Daydi itning so‘nggi kunlarini quvonchga to‘ldirgan qiz

Kolumbusda istiqomat qiluvchi Nikol Elliot davosiz dardga chalingan Chester laqabli itga xo‘jayini kerakligi haqidagi e’lonni o‘qib qoldi. Qiz daydi itning so‘nggi kunlarini quvonchli o‘tkazish uchun uni o‘z qaramog‘iga oldi. Chester oynalari ochiq mashinada sayr qilishga, xot-doglarni paqqos tushirishga va hatto spa-vanna qabul qilishga ulgurdi.

Birgina fotosurat sabab hayoti o‘zgarib ketgan uysiz bola

Filippinning Mandaue shahrida yashovchi Joys Gilos-Torrefranka ismli talaba qiz McDonald’s restorani yorug‘ida uy vazifasini qilib o‘tgan uysiz bolani suratga oldi. Talaba bu suratni ijtimoiy tarmoqlarga joylashtirganidan ko‘p o‘tmay, odamlar bolakay uchun pul yubora boshladi. Aynan shu surat sababli uysiz bola Filippin siyosiy arboblaridan stipendiya va ko‘mak oldi.

• Ko‘chada dars tayyorlayotgan qashshoq oila farzandining surati Internetni larzaga soldi

Bir kishi hamma uchun, hamma bir kishi uchun

Yigit bitiruv oqshomiga bora olmadi, biroq bitiruv oqshomi uning oldiga keldi.

Cho‘kayotgan bug‘u bolasini qutqarib qolgan bola

Bangladeshning Nokxali okrugi yaqinida yuz bergan suv toshqinlari vaqtida Bilol ismli bolakay cho‘kayotgan bug‘u bolasini ko‘rib qoldi. U o‘z hayotini xavf ostiga qo‘yib, jonivorni qutqardi.

O‘yinchoqlar do‘konini bolalarga sovg‘a qilgan ayol

Nyu-yorklik Kerol Sachman bankrotlik yoqasida turgan o‘yinchoqlar do‘konini sotib olib, uning barcha mahsulotlarini uysizlarga ko‘mak berish departamentining shahar bo‘limiga yubordi.

Himoyasiga butun Rossiya otlangan Peterburgning eng yaxshi chiptachisi

Viktor Petrovich Lukyanov Rossiyaning Sankt-Peterburg shahrida chiptachi bo‘lib ishlaydi. U o‘zining yaxshi hislatlari bilan nom chiqargan — yo‘lovchilarga 79 tilda minnatdorchilik bildirardi, pensionerlarga joy bo‘shatgan yo‘lovchilar o‘rniga o‘zi yo‘l haqini to‘laydi va hokazo. Qorovullarning sovuq muomalasidan charchagan chiptachi bir kuni ishdan bo‘shash haqida ariza yozdi. Biroq uni ko‘pchilik qo‘llab-quvvatladi va rahbariyat undan ishda qolishni so‘radi.

Nogiron nevarasini besh yil opichlab yurgan buvi

Xitoyning Sichuan viloyatida istiqomat qiluvchi 66 yoshli buvi 14 yoshli nogiron nevarasini opichlab, besh yil davomida har kuni maktabga qatnadi. O‘tgan davr mobaynida u tog‘ so‘qmoqlari bo‘ylab to‘rt ming kilometrdan ortiq yo‘l bosdi. OAV va hukumat bu holatdan xabar topganidan so‘ng, oila maktabga yaqin uyga ko‘chib o‘tdi, qizaloqqa esa, u mustaqil ravishda harakatlana olishi uchun, nogironlar aravachasi sovg‘a qilindi.

Egasiz jonivorlarni boqish uchun xavfli hududda qolgan yapon

Naoto Matsumura 2011-yilgi zilzila va sunamidan so‘ng yopiq hudud deb e’lon qilingan Fukusima yaqinida yashashdan qo‘rqmagan yagona inson hisoblanadi. U boshqa aholi bilan birga shaharni tark etgandi, biroq qarovsiz qolgan jonivorlarga g‘amxo‘rlik qilish maqsadida qaytishga qaror qildi.

Uyli bo‘lgan boshpanasiz it

Rossiyalik taniqli aktyor Konstantin Xabenskiy o‘zining zotsiz jonivorini boshpanasiz itlar uyidan olgan vaqtida u irkit va kasal edi. Aktyor uni tozalab yuvintirdi, davoladi va ardoqladi. It qorong‘ulikdan qo‘rqadi, shu sababli Xabenskiy kechasi uy chirog‘ini o‘chirmaydi.