Украина президенти Пётр Порошенко Донбассдаги урушда қатнашгани учун 14 йилга озодликдан маҳрум этилган Россия фуқароси Владимир Старковни афв этди. Бу ҳақда, Meduza хабарига кўра, Украина президенти сайтида ахборот берилган.
Хабар беришларича, Старков ўзини мустақил деб эълон қилган «Донецк халқ республикаси» («ДХР») айирмачилари қўлида асирликда сақланган Украина армияси ҳарбий хизматчиси Андрей Гречановга алмаштирилган.
Украина президенти сайтида хабар берилишича, 1 декабрга ўтар кечаси Порошенко «Раҳмон» жанговар лақаби билан ҳам танилган Гречанов билан учрашиб, асирликда кўрсатган мардлиги ва қаҳрамонлиги учун миннатдорчилик билдирди.
«Андрей Гречанов кабилар учун биз охиригача курашамиз. Биз уни асирликдан қутқариш учун 18 марта ҳаракат қилдик. Бугунгни ёруғ кунда у уйига қайтди», — деди Порошенко.
Россия фуқароси Владимир Старков қурол-яроғ ортилган машина билан 2015 йил 25 июль куни Донецк вилоятининг «Березовое» назорат-ўтказиш пунктида қўлга олинган эди. Юк машинаси айирмачилар назорати остидаги ҳудудда ҳаракатланаётган бўлган.
Украина хавфсизлик хизмати Владимир Старков ўзини россиялик майор экани, Россия ҳукуматидан унга ёрдам беришни сўраётгани акс этган видеоёзувни эълон қилганди. Россия Мудофаа вазирлиги Старковнинг Россия армиясининг амалдаги зобити эканлиги борасидаги баёнотига ҳеч қандай изоҳ бермаганди.
Украина суди 25 сентябрь куни Старковни «Украинага қарши тажовузкор урушда» ва Росся Бош штаби буйруқларини бажаришда айбдор деб топиб, мол-мулкини мусодара қилиш билан 14 йилга озодликдан маҳрум этганди.
Изоҳ (0)